2024 yilda migrantlar oʻlimi rekord darajaga etdi, ularning 10 foizi zoʻravonlik qurboni – BMT

2024 yil migrantlar uchun eng fojiali yil sifatida qayd etildi. BMTning migratsiya boʻyicha agentligi bergan maъlumotlarga koʻra, xavfli yoʻllarda kamida 8 938 kishi halok boʻlib, ulardan har oʻntadan biri zoʻravonlik qurboni boʻlgan. Bu oʻlimlar orasida otishmalar, pichoqlash, kaltaklash, shuningdek, davlat tomonidan ruxsat etilgan qatl holatlari ham mavjud.


Migratsiya boʻyicha eng xavfli yoʻnalishlar orasida Osiyo birinchi oʻrinda turib, undan keyin Oʻrta Er dengizi orqali oʻtish va Afrika, jumladan, Sahroi Kabir hududlari joylashgan.


“Dunyoda migrantlar orasida oʻlim holatlarining keskin ortishi xalqaro miqyosda kompleks yondashuv zarurligini koʻrsatmoqda. Bu kabi fojialarning oldini olish uchun global hamkorlik va samarali choralar talab etiladi,” dedi Xalqaro Migratsiya Tashkiloti (IOM) operatsiyalar boʻyicha bosh direktor oʻrinbosari oʻz bayonotida.


IOM hisobotiga koʻra, migrantlarning 10 foizi zoʻravonlik natijasida halok boʻlgan, jumladan, otishma, pichoqlash, kaltaklash va davlat tomonidan rasmiylashtirilgan oʻldirishlar. Migrantlarga nisbatan zoʻravonlik eng koʻp Eron, Myanma, Bangladesh va Meksikada qayd etilgan. Biroq, tashkilot ushbu qotilliklar uchun aynan kim masъul ekanini aniqlab koʻrsatmagan.


IOM 2014 yildan buyon migrantlar oʻlimi boʻyicha maъlumot toʻplaydi. 2021 yildan beri har yili bu raqam ortib bormoqda. Tashkilotning taъkidlashicha, rasmiy qayd etilmagan minglab oʻlim holatlari bor, chunki aksariyat migrantlarning yoʻqolishi yoki halok boʻlishi haqida aniq maъlumotlar mavjud emas.


Jenevada joylashgan IOM va boshqa xalqaro tashkilotlar qochqinlar va majburan koʻchirilgan shaxslarni qoʻllab-quvvatlab keladi. Biroq, soʻnggi yillarda AQSh tomonidan ajratiladigan moliyaviy yordamning qisqarishi natijasida tashkilot oʻz faoliyatini qisqartirish yoki ayrim dasturlarni butunlay yopishga majbur boʻldi.

Mavzuga aloqador

Eng ko‘p o‘qilgan

Tavsiya qilingan