Odessa portiga hujum qilindi: qurbonlar bor

Rossiya qoʻshinlari oxirgi toʻrt kun ichida Ukrainaning Odessa viloyatidagi portga ballistik raketalar bilan zarbalar bermoqda. Oxirgi uyushtirilgan hujum natijasida 6 kishi halok boʻldi, yana 8 kishi yaralandi, ulardan toʻrt nafarining ahvoli ogʻir. Shuningdek, xorijiy davlatlarga tegishli uchta kema zararlandi.

9 oktyabrʻ oqshomida Rossiya qoʻshinlari Ukrainaning Odessa viloyati port infratuzilmasiga raketa hujumi uyushtirdi. Hujum natijasida 6 kishi halok boʻldi, yana 8 kishi yaralandi, ulardan toʻrt nafarining ahvoli ogʻir. Bu haqda Ukrainani qayta tiklash boʻyicha bosh vazir oʻrinbosari Aleksey Kuleba va Odessa viloyati harbiy boshqarmasi raisi Oleg Kiper maʻʻlum qildi.

Dastlab Aleksey Kuleba Rossiya kuchlarining Odessa viloyati port infratuzilmasiga uyushtirgan ballistik raketa hujumi natijasida besh kishi halok boʻlgani va toʻqqiz kishi yaralangani haqida xabar bergan edi. Uning soʻzlariga koʻra, qurbonlarning barchasi ukrainaliklardir. "Hozir ularga tibbiy yordam koʻrsatilmoqda, besh nafarining ahvoli ogʻir", - dedi Kuleba.

Keyinroq harbiy boshqarma raisi Oleg Kiper halok boʻlganlar soni 6 nafarga, yaradorlar soni esa 8 nafarga etganini, ulardan toʻrt nafarining ahvoli ogʻir ekanini maʻʻlum qildi.

Hujum chogʻida Panama bayrogʻi koʻtarilgan fuqarolik kemasi, Shui Spirit konteyner tashuvchi kema ham shikastlangan. Bu oxirgi toʻrt kun ichida Rossiya tomonidan hujumga uchragan uchinchi xorijiy kemadir.

Eslatib oʻtamiz, 6 oktyabrʻ kuni Rossiya kuchlari Odessaga “Shahed” dronlari bilan hujum qilib, tinch aholiga moʻljallangan quruq yuk kemasiga zarar etkazgandi. 7 oktyabrʻ kuni esa Odessa portiga raketa hujumi natijasida 60 yoshli ukrainalik halok boʻldi, 5 nafar xorijlik fuqaro jarohatlandi.

Mavzuga aloqador

Eng ko‘p o‘qilgan

Tavsiya qilingan