Suriya Rossiya bilan Tartus portini ijaraga olish boʻyicha kelishuvni bekor qildi

Suriya 2019 yilda Bashar Asad davrida imzolangan Tartus portini Rossiyaning «Stroytransgaz» kompaniyasiga 49 yilga ijaraga berish toʻgʻrisidagi shartnomani bekor qildi. Port faoliyatidan olingan barcha daromadlar Suriya davlati manfaatlari yoʻlida foydalaniladi.

Suriya 2019 yilda Bashar Asad davrida imzolangan Tartus portini Rossiyaning «Stroytransgaz» kompaniyasiga 49 yilga ijaraga berish toʻgʻrisidagi shartnomani bekor qildi. Bu haqda Tartus bojxona boshqarmasi direktori Riyod Judiyga tayangan holda “Al-Vatan” arab nashri xabar berdi.

Judiyning soʻzlariga koʻra, Suriya port ustidan nazoratni tiklagan.

“Rossiya kompaniyasi bilan imzolangan Tartus portiga sarmoya kiritish shartnomasi bekor qilindi. Port faoliyatidan olingan barcha daromadlar Suriya davlati manfaatlari yoʻlida foydalaniladi”, - dedi Judiy.

Shuningdek, u port ishchilari rus mutaxassislari tomonidan modernizatsiya qilinmagan eskirgan uskunalarni tiklashga qaytishayotganini va shuning uchun Tartusni qayta tiklash bilan yangi hokimiyatning oʻzi shugʻullanishini taʻʻkidladi. Rossiya tomonidan hech qanday izoh berilmagan.

Avvalroq Suriyaning yangi hukumati bir necha bor Rossiya harbiy-dengiz kuchlarining 720-logistika punkti joylashgan Tartusda rossiyalik harbiylar mavjudligini saqlab qolish tarafdori ekanini ochiq bildirgan edi. Ustuvorliklar oʻzgarishiga nima sabab ekanligi va Suriya rasmiysining soʻzlari ishlarning haqiqiy ahvoliga qay darajada mos kelishini vaqt koʻrsatadi.

Mavzuga aloqador

Eng ko‘p o‘qilgan

Tavsiya qilingan