Gulnora Karimova manzil koloniyaga oʻtkazildi


Oʻzbekistonning birinchi prezidenti Islom Karimovning qizi Gulnora Karimova Zangiota tumanidagi 42-manzil koloniyaga oʻtkazildi. Bu oʻzgarish Yangi yil arafasida amalga oshirilgan boʻlib, Platina.uz manbasi bu haqda xabar berdi.

Karimova shu paytgacha ushbu tumandagi 21-ayollar qamoqxonasida jazo muddatini oʻtayotgan edi. U 2020 yilda yangi ayblovlar asosida 13 yilu 4 oyga ozodlikdan mahrum qilingan. 

Gulnora Karimovaga qarshi ilk jinoyat ishi 2013 yilda ochilgan. 2015 yilda unga 5 yillik ozodlikni cheklash jazosi tayinlangan edi. 2017 yilda esa 10 yillik ozodlikdan mahrum qilish jazosi berildi, ammo keyinroq bu jazo 5 yillik ozodlikni cheklash bilan almashtirildi.

Uy qamogʻida boʻlgan davrida u qoidalarni buzgani sababli yana qamoqqa olingan. 2020 yilda qoʻshimcha ayblovlar bilan sud hukmi chiqarilib, 13 yilu 4 oylik ozodlikdan mahrum qilish jazosiga tortilgan. Shundan beri Karimova 21-ayollar qamoqxonasida jazo oʻtayotgan edi.

Manzil koloniyalariga oʻtkazish amaliyoti mahkumlar jazo muddatining bir qismini oʻtab boʻlganidan keyin qoʻllaniladi. Bunday koloniyalarda jazo shartlari biroz engil boʻlib, mahkumlar ijtimoiy foydali mehnat bilan shugʻullanish imkoniyatiga ega boʻladilar.

Mavzuga aloqador

Eng ko‘p o‘qilgan

Tavsiya qilingan