Ҳиндистон Покистон ҳудудига ракета зарбаларини берди
Ҳиндистон Покистон ва унга қарашли Кашмир ҳудудидаги тўққизта объектга авиазарбалар йўллади. Бу ҳақда TRT нашри хабар қилди.
Деҳли томонининг баёнотига кўра, зарбалар аниқ нишонга қаратилган бўлиб, улар ҳарбий объектларга эмас, бошқа белгиланган нуқталарга йўналтирилган.
Покистон ҳукумати ҳам ушбу ҳужумни расман тасдиқлади. Исломобод расмийларининг билдиришича, Ҳиндистон учта алоҳида ҳудудга ракета ҳужумлари уюштирган.
Воқеа гувоҳларининг сўзларига кўра, зарбалардан сўнг Покистоннинг Музаффарабод шаҳрида электр таъминоти бутунлай узилган.
АҚШ президенти Доналд Трамп Ҳиндистоннинг ракета зарбалари юзасидан ўз фикрини билдирди.
“Бу – уятли ҳолат. Биз бу ҳақда эндигина хабар топдик”, деди Трамп журналистларга. – “Мен фақат шуни истайман: бу низо имкон қадар тезроқ тўхтасин”.
Унинг сўзларига кўра, бу каби вазият юз бериши мумкинлиги илгари ҳам тахмин қилинган эди, чунки Ҳиндистон ва Покистон “кўп йиллар, ҳатто асрлар давомида” бир-бирига қарши курашиб келмоқда.
Трамп, шунингдек, икки давлат ўртасидаги тарихий зиддиятлар янги тўқнашувларга сабаб бўлиши мумкинлигини таъкидлади ва томонларни вазминликка чақирди.
Мавзуга алоқадор
-
Ҳиндистон ва Покистон ўртасида зиддият тобора кучаймоқда. Ҳиндистон ҳарбий-ҳаво кучлари бош қўмондони, авиация бош маршали А. П. Сингҳ Покистон билан чегарада ҳаво кучлари тўлиқ жанговар тайёргарликка келтирилганини маълум қилди. Бунга жавобан, Покистон расмийлари ҳам ҳарбий тайёргарлик кўраётганини эълон қилди. Айтилишича, Покистон армияси Fatah серияли “ер-ер” ракетасини синов тариқасида муваффақиятли учирган.
-
Ҳиндистон ҳукумати Покистон билан бўлаётган зиддиятлар фонида бутун мамлакат бўйлаб йирик фуқаролик мудофааси машғулотларини ўтказа бошлади. Машғулотлар доирасида ҳаво ҳужуми сигнализациясини синаш, электр таъминотини вақтинча тўхтатиш ва эвакуация протоколларини текшириш каби чора-тадбирлар амалга оширилмоқда.
