Трамп: "Хат ёздим". Эрон: "Етиб келгани йўқ"
Эрон АҚШ президенти Дональд Трампнинг ядровий дастур бўйича музокара ўтказиш таклифи билан йўллаган хати қабул қилингани ҳақидаги баёнотини рад этди. Эроннинг БМТдаги доимий ваколатхонаси Теҳрон Вашингтондан ҳеч қандай мактуб олмаганини маълум қилди.
Аввалроқ Трамп Fox Business Network телеканалига берган интервьюсида Эроннинг олий раҳбари Али Хоменайига музокаралар ўтказиш таклифи билан хат юборганини айтган эди. Унинг сўзларига кўра, Эронга ёки мулоқотга киришиш, ёки АҚШнинг ҳарбий босимига дуч келиш таклиф қилинган.
Бироқ Теҳрон бу сўзларга ишончсизлик билан муносабат билдирди. Эроннинг олий раҳбари аввал ҳам Трамп маъмурияти билан ҳар қандай музокарани кескин рад этиб, уни «ишончсиз» деб атаган. Эрон президенти Масуд Пезешкиан ва ташқи ишлар вазири Аббос Аракчи бир неча маротаба Теҳрон босим остида мулоқот олиб бормаслигини таъкидлаган.
«АҚШ максимал босим ва таҳдид сиёсатини давом эттирар экан, тўғридан-тўғри музокаралар имконсиз», — деди Аракчи Саудия Арабистонида берган интервьюсида.
Вашингтон ва Теҳрон ўртасидаги муносабатлар, айниқса, АҚШ 2018 йили ядровий келишувдан чиққач, таранглигича қолмоқда. Трампнинг янги баёнотлари фонида Оқ уй дипломатик муросага тайёрми ёки куч ишлатиш сценарийсини кўриб чиқаяптими, номаълум бўлиб қолмоқда.
Мавзуга алоқадор
-
Россия президенти Владимир Путин 25 декабрь куни Бокудан Грознийга учган Azerbaijan Airlines самолётига Россия ҳаво ҳудудида «физик ва техник таъсир» бўлгани сабаб юзага келган ҳолат учун Озарбайжон президенти Илҳом Алиевдан узр сўради.
-
АҚШ ҳукумати Сурияга қарши санкцияларни олти ойга юмшатиш ҳақида қарор қабул қилди. Бу ўзгариш мамлакатдаги гуманитар вазиятни яхшилаш мақсадида киритилган бўлиб, гуманитар ташкилотлар ва банкларга мамлакатга ёрдам бериш жараёнида АҚШ санкцияларини бузишдан қўрқмасдан фаолият юритиш имконини беради.
