Венесуэла АҚШдан депортация қилинган фуқароларни қабул қилишга тайёрлигини билдирди

Венесуэла Миллий ассамблеяси раиси Хорхе Родригеснинг маълум қилишича, АҚШ депортация қилишни режалаштираётган венесуэлалик муҳожирларни қабул қилиш учун мамлакат барча зарур тайёргарликни якунлаган. Бироқ, АҚШ томони бу жараёнга зарурий ёрдамни кўрсатмаяпти.


Каракасдаги президентлик саройида сўзга чиққан Родригес АҚШ Давлат департаментини репатриация рейсларини блоклашда ва жараёнга сунъий тўсиқлар яратишда айблади.


"Биз тўлиқ тайёрмиз, фақат керакли координацияни таъминлаш қолган", деди у.


Родригес, шунингдек, АҚШ томонидан Салвадордаги махсус турмага жойлаштирилган венесуэлалик муҳожирлар масаласига ҳам тўхталди. Ушбу шахслар жиноятчи гуруҳлар билан алоқада бўлганликда айбланмоқда. 


Унинг сўзларига кўра, Венесуэла ҳукумати аллақачон етакчи америкалик миграция ҳуқуқи бўйича юридик фирмаларга мурожаат қилиб, ҳибсга олинганларнинг ҳуқуқий ҳимоясини таъминлаш бўйича иш олиб бормоқда.


"Биз уларнинг озод этилиши учун барча имкониятларни ишга соламиз", дея ваъда берди Родригес. Бундан ташқари, у Салвадор ҳукуматини кескин танқид қилиб, қуйидагича баёнот берди:


"Қандай қилиб президент Найиб Букеле ҳеч қандай жиноят содир этмаган ёшларни АҚШ ёки Венесуэладан айбсиз ҳолда олиб келинишига йўл қўйиб, бунинг эвазига пул талаб қилиши мумкин?"


Бунга қадар Доналд Трамп администрацияси венесуэлалик жиноятчи гуруҳ "Трен де Арагуа"га алоқадор деб гумон қилинган муҳожирларни депортация қилиш жараёнини тезлаштириш учун фавқулодда ваколатлардан фойдаланган эди. Вашингтон ушбу гуруҳни "хорижий террористик ташкилот" деб эълон қилган.


Гарчи федерал суд депортацияларни вақтинча тўхтатиш тўғрисида қарор чиқарган бўлса-да, АҚШ ҳукумати юзлаб ноқонуний муҳожирларни Салвадорга жўнатди.

Мавзуга алоқадор

Энг кўп ўқилган

Тавсия қилинган