5 сентябрдан Қирғизистонда хорижликлар учун рўйхатдан ўтмасдан қолиш муддатини чекловчи ва мамлакатда узоқ муддат бўлиш учун мажбурий ҳужжатларни жорий қилувчи янги қоидалар кучга киради.

Самарқанд суди СССРни тиклаш тарафдори бўлган 74 ёшли фуқарога 3 йилга озодликни чеклаш жазосини тайинлади. У Telegram-гуруҳида «Ўзбекистон мустақиллиги юзаки экани ва собиқ Совет Иттифоқи расман тарқалмагани» ҳақидаги материаллар жойлаштирган. Айбланувчи судда ўз айбини тан олмаган, бироқ суддан жазони енгиллаштиришни сўраган.

4-5 сентябрь кунлари Ўзбекистон Давлат хавфсизлик хизмати томонидан МДҲ мамлакатлари ваколатли органларининг «Шарқ-Аксилтеррор – 2024» қўшма аксилтеррор машғулотлари ўтказилади. Шунингдек, Тошкентда ШҲТ Минтақавий аксилтеррор тузилмасининг X халқаро илмий-амалий конференцияси ҳамда МДҲ терроризм ва экстремизмга қарши кураш бўйича II конференцияси бўлиб ўтади.

2024 йил 1 ноябрдан «Қизил-Қия» – «Автодорожний» чегара божхона постида юк ташишда электрон навбатни бошқариш тизимини жорий этиш бўйича тажриба лойиҳаси бошланади. Европа Иттифоқи томонидан молиялаштирилаётган лойиҳа Халқаро Савдо Маркази кўмагида амалга оширилмоқда. Тажриба босқичи жорий йилнинг 15 декабрига қадар давом этади.

Турк Миллий разведка ташкилоти Исроилнинг МОССАД ташқи разведка хизмати учун Туркияда фаолият олиб бораётган шахсларга пул етказиб турган косовалик Лиридон Рексепини ҳибсга олди. Рексепи, шунингдек, дрон ёрдамида тасвирга олиш, фаластинлик сиёсатчиларга қарши психологик амалиётлар ўтказиш билан ҳам шуғулланган.

Россиянинг Нижний Новгород вилоятида «Қозоғистон-Москва» йўналишида ҳаракатланиб кетаётган Hyundai микроавтобуси КІА сerato машинаси билан тўқнашди. Оқибатда 7 ўзбекистонлик — олти эркак ва бир аёл ҳалок бўлди, 3 киши жароҳатланди. Вафот этганларнинг жасадларини ватанга қайтариш чоралари кўрилмоқда.

Турк ёшлари иттифоқи (TGB) аъзолари Исроилни ҳимоя қилиш учун минтақага жўнатилган, ҳозирда Туркиянинг Измир портига вақтинчалик лангар ташлаган АҚШнинг USS Wasp самолёт ташувчи кемасида навбатчилик қилгани айтилаётган америкалик аскарни калтаклаб, бошига қоп кийдиришди.

Қозоғистон президенти Қосим-Жомарт Тоқаев 6 октябрь куни мамлакатда атом электр станциясини қуриш бўйича референдум ўтказилишини маълум қилди.

Сурхондарё вилоятининг Бойсун туманидаги «Мустақилликнинг 25 йиллиги» конида олтингугурт (водород сулфид) гази чиқиши кузатилди. ФВВ кон яқинидаги фуқаролар эвакуация қилингани, вазият тўлиқ назоратда эканинимаълум қилди. Ҳавонинг ифлосланиш даражаси ўрганилмоқда, жабрланганлар йўқ.

Қозоғистон биринчи президенти Нурсултон Назарбоев жиянининг собиқ рафиқаси Гулмира Сатибалди собиқ бизнес шериги Абай Жунусовни 165 кун давомида мажбуран сақлаб тургани учун тўққиз йилга қамади. Аёл шу йўл билан шеригини компаниялардаги улушидан воз кечтирмоқчи бўлган.